2015 沖繩OTS租車+自駕分享篇

2015 沖繩OTS租車+自駕分享篇

呢次出發去沖繩有2個目的 

第一個係想試下係日本渣車 

睇其他人遊記，個個都話係日本渣車好容易、 冇咩難度 

而且去鄉郊或交通唔方便的地方，自駕會比較方便

雖然我有車牌，但已經十幾年都冇渣過車 

去一個陌生的地方渣車真係有D驚

所以選擇係沖繩開始自駕遊，應該唔會出大問題吧!?

第二個係去沖繩藍洞玩潛水和浮潛 

我唔識游水，基本上所有水上活動唔會去玩 

都係睇左人地遊記，原來係沖繩玩潛水好安全 

趁自己仲後生(!?)，應該多試試新事物， 免得老左會後悔 

所以今次沖繩之旅獻出了本人的兩個第一次...

凌晨2點到達機場，空無一人

呆坐到5點就去櫃檯辦理登機手續

飛機餐只有一個香腸麵包.. 

 

飛機到達後，我習慣急步快走 

除左想儘快呼吸日本的空氣之外 

我個肚開始有D痛，懷疑係個個麵包出事... 

係海關排隊時回頭一望 

差唔多有百幾人係我後面...

 見到好似有2個旅行團剛剛到達 

順利出關後，先去洗手間 

同以前一樣，單身旅客都要打開行李檢查

 簡單檢查後就出去離境大堂 

出去後已經見到OTS個牌

除左OTS外我仲見到其他的租車公司

如果冇記錯見到有Toyota, Nippon和其他的 

果然最多人係OTS，全部都係台灣人和香港人 

和OTS工作人員確認個名後，佢會講一個號碼比你

當佢叫你個號碼時，就可以跟佢出去坐接待巴士

  係車上工作人員會講係沖繩渣車有乜野要注意

但車內的冷氣實在太弱，熱到我汗流浹背

完全冇心情聽佢講野

仲要等佢講完廢話後汽車先會開...

大約十分鐘到達OTS租車中心 

出發前已經係OTS網頁預約

40天前預約優惠，不論日文或中文版價錢都係一樣的 

取車時間  28/6/2015 13:00，歸還時間 3/7/2015 18:00

    基本費用:            14,280 

   免責保險費:           9,720 

     安心保險:              3,240  

   Wifi  Pocket:          3,000

Total 30,240日元   換算港幣大約 $1,960，平均每日 $326 

網上預約時也順便預訂了一個wifi pocket 

只有呢個OTS中心能夠租借wifi pocket 

而且要比5,000日元按金 (要用現金比)，還車時先會退返比你 

Wifi本體，USB線，火牛和汽車充插

上網速度唔錯  都幾快

  比錢後要等一陳，呢個時候可以去買海洋博物館或其他景點的門票

之後有工作人員會搵你一齊去停車場取車 

佢會同你一齊檢查車身，如果有花痕會係紙上記錄 

之後上車佢會教你點用GPS

確認冇其他問題後，我的沖繩自駕遊終於要開始了... 

就係呢部 "小黑" 陪著我係沖繩旅遊和冒險 

設定好目的地後，急不及待即刻開車出發 

個人感覺用電話號碼比Map Code好...

雖然十幾年冇渣車，只係渣左一陳，"車神" 的感覺返來了...

係高速公路上，只係跟著前車行，車速開到130km...好鬼爽... 

高速公路只係直路一條當然冇問題

但係泊車技術就大大退步，倒後泊車要很多次先成功泊好

  係呢6日渣車期間，只要根著GPS指示就去到目的地

唯一問題 (對我來講) 關於要左轉或右轉時

距離轉灣大約200米時，GPS會大叫 "立即轉灣"...

  比佢嚇一嚇，有幾次都早左轉彎...

害我走左好多冤枉路，浪費好多時間和汽油

其實當距離大約50米時預備轉灣就唔會錯

有一次都係右轉，當距離100米時，我睇唔到前面有路可以轉右，以為GPS出錯

當距離30米先見到原來有條小路可以右轉，但發現時都已經太遲... 

曾經有一晚係浜の家附近，心急想早D轉右入去停車場

見到冇車，就直接係右邊的行車線度行... 

差唔多到達入口時，突然有車係我面前出現... 

對面個個司機見到我都嚇左一跳，仲O哂嘴... 

幸好最後都冇發生碰撞...

係某個大停車場，見到同我呢部車一樣款式的

差唔多有十幾架，全部都有OTS的貼紙....

車尾箱大約可以放到4個 25吋旅行箱

渣車途中有幾次唔小心掂到螢幕，畫面唔係freeze左就係去左第2個地方 

解決方法只有搵地方停車，再重新設定GPS

注意: 渣車途中唔可以更改目的地，要停車和拉起手制，先可以再設定

車廂內有音源線提供，可以接駁手提電話播放音樂

開始時里程數係 55799

還車時係 56103，6日只係行左300多 

而且只係入左一次油約3000多日元