2017年2月21日 星期二

清萊自駕遊分享


都未正式出發去清萊,租車竟然發生意外...  

編排行程時,知道好多景點遠離市中心  
公共交通資料唔多,去景點只有參加一日團或包車  
一日團我怕太趕時間,包車得我一個人又太貴  
深思熟慮後最後決定租車自駕

出發前半年就買左機票,係Hertz Thailand租車  
大約一個月後,收到電郵通知飛去清萊的時間有更改  
因為到達清萊早左一個鐘,所以取車時間都要改提早  
原本以為係Hertz網頁改時間就得,點知就係呢度出左事

直到出發前一星期我再confrim所有資料有冇錯 
機票冇問題、租車日期時間車款保險都冇問題  
但係...點解取車地點會係"曼谷機場"...
個心即刻嚇到離一離.... 

應該係清萊機場,點解突然變左曼谷機場....  
即刻睇返email,第一次預約確認係清萊機場  
更改時間後第二次確認竟然變左曼谷機場...

即刻去Hertz網頁睇返個預約,已家先發現原來更改資料要重頭再寫一次  
  第一個取車地點佢預設左係 "曼谷機場....

實在太遲了,想租車個幾日所有車都已經被預約,乜車都冇 
估唔到清萊竟然咁多人租車自駕  

之後係其他泰國租車網站都係冇車
大檸樂,如果租唔到車,行程要大改或者真係要包車...  

2日後係某個討論區見有人分享thairentacar的"Promotion Code"  
即刻試下租唔租到車 
第一日冇車,但之後連續幾日有車
四天租車費用+保險只係四千泰幣,平均$230港幣一日,好鬼平...
 
不過只有1200cc的汽車 ,搞惦租車後,終於可以放心等待出發...


係泰國租車只需要護照和國際車牌,取車時要用信用卡先比一萬泰幣訂金
還車時冇問題就會取消  

曾經有d擔心租車費咁鬼平,會不會比部又舊又殘的車我  
但當我見到汽車時,職員話比我知呢部係新車...
check都唔使check就叫我走得...



車尾箱算大,可以放到3-4個25吋行李箱



打開左下方個蓋,有USB插口


泰國汽車本身沒有導航系統,租車時可以租GPS  
不過我用手機goole map導航,基本上冇問題  
只有係山區的山頂短暫時間收唔到訊號



出發前有少少擔心清萊呢個咁偏辟地方,馬路好唔好行 
原來都幾好行,冇發生大意外 
市中心比預期多車和塞車,遠離市區就汽車唔多
交通燈都好少,中段有好多位比車U Turn掉頭 

曾經遇到一次警察檢查站,但只截停電單車  
唔知係唔係捉冇國際牌的遊客... 

頭兩日渣車都係去市區唔遠的景點,道路又直又長
就算我呢d Holiday Driver都冇問題  
之後去Doi Tung和美斯樂,惡夢先出現...  

呢兩個地方都係處於山區位置,道路只能用九曲十三灣來形容
轉灣轉到頭暈頭痛,不過渣慢一點問題唔大  
最大問題係當架車要上45度斜坡時,油門踩到盡都只係行20公里...
個時我仲以為架車冇油...下次租車一定要1500cc以上的...


係機場取車後,就直接去黑屋  
黑屋對面有停車場,但佢唔似一個正式的停車場  
似係求其一塊空地比人泊車  
因為我剛取車不久,仲未太慣渣車,加上自己又唔小心大意  
倒後泊車時就撞花左車頭....


黑屋真係十分黑,取車後不足一小時就發生意外....  
小喇叭! 心情大差...之後幾日仲擔心要不要賠錢...  
好彩最後都唔使賠錢...Lucky!


如果有機會再黎清萊,我都會繼續租車自駕,因為實在比預期容易和方便

4 則留言:

  1. 都撞得幾花下喎~
    清萊自駕都有得諗喎, 要追睇你呢個遊記先得^^

    回覆刪除
    回覆
    1. 撞到舊石...好彩冇撞車撞人
      清萊自駕都OK﹐夜晚我就唔敢渣

      刪除
  2. 嘩,我都想去清萊睇白廟,但最後啲直航時間唔好取消咗。

    等睇你自駕周圍去!

    回覆刪除